InnoSpherIC é unha iniciativa que xorde da Universidade de Santiago, e baséase nunha plataforma para a xeración de vacinas subunitarias e proteínas inmobilizadas.

Mediante esta plataforma, poden facer que calquera tipo de célula xere microesferas proteicas. Estas microesferas poden ser cargadas con proteína, por exemplo proteínas de virus, que usan como vacinas.

Con esta metodoloxía xeraron candidatos de vacinas testados en modelos de rato contra o Virus da Lingua azul ( BTV), o virus da febre do val do Rift ( RVFV) e o Virus da Peste Equina Africana ( AHSV).

Tamén testaron a tecnoloxía como posible inmunoterapia contra o cancro, en colaboración cun laboratorio pertencente á Axencia do Medicamento do Reino Unido ( MHRA) con resultados prometedores. Neste caso cárganse as proteínas con antígenos do tumor que se pretende destruír, de forma que, ao presentarlle estas proteínas ao sistema inmune nos seus microesferas, o propio sistema inmune ataca ao tumor.

Actualmente están a desenvolver un candidato de vacina contra o SARS- CoV-2 mediante un proxecto que recibiron por parte da Iniciativa Europea de Vacina (EVI), así como profundando no enfoque como inmunoterapia contra o cancro mediante un proxecto por parte da AECC – Asociación Española Contra o Cancro.